Tá útlendingar koma til Føroya, eru hesar reglur galdandi:

Steðgur stytri enn 3 mánaðir

Tá útlendingur kemur til Føroya og steðgar stytri enn 3 mánaðir, skal hann, tá hann kemur til landið, vísa galdandi ferðaprógv og hava neyðugt gjaldføri til uppihald og heimferð.

Um endamálið við steðginum í Føroyum ikki er frítíðaruppihald, skal útlendingurin hava arbeiðsloyvi fyri at útinna lønt ella ólønt arbeiði ella líknandi virksemi.

Pass

Norðurlendskir ríkisborgarar skulu ikki vísa pass.

Aðrir útlendingar skulu vísa galdandi pass.

Útlendingar úr londum, har visum krevst, skulu hava visa, galdandi fyri Føroyar í upp til 3 mánaðir, ella uppihaldsloyvi.

Uppihaldsloyvi

Treytir fyri at fáa uppihaldsloyvi í Føroyum:

• Neyðugt gjaldføri til uppihald og heimferð. Um hjúnarfelagi/sambúgvi rindar útreiðslurnar, fellur kravið burtur. Umsøkjarin og hjúnarfelagin skulu vátta, at tey búgva saman.
  
• Pass, galdandi í minsta lagi 2 mánaðir útyvir ta ynsktu uppihaldstíðina.

Umsókn um uppihaldsloyvi verður skrivað á umsóknarblað og latið inn á danska sendistovu ella dansk konsulát í heimlandinum ella tí landi, har umsøkjarin hevur  verið seinastu 6 mánaðirnar. Saman við umsóknini skal latast inn pass og 2 passmyndir.

Børn, yngri enn 18 ár, sum hava fastan bústað hjá tí, ið hevur foreldramyndugleikan, skulu ikki lata inn serstaka umsókn. Tey skulu vera skrivaði í passið hjá umsøkjaranum ella hava egið pass.

Uppihaldsloyvi í Danmark er ikki galdandi í Føroyum.

Uppihaldsloyvi gevur ikki loyvi at arbeiða.

Arbeiðsloyvi

Umsókn um uppihalds- og arbeiðsloyvi verður skrivað á umsóknarblað og latin inn á danska sendistovu ella konsulát í heimlandinum ella tí landi, har umsøkjarin hevur  verið seinastu 6 mánaðirnar. Saman við umsóknini skal latast inn pass og 2 passmyndir.

Treytir fyri at fáa arbeiðsloyvi:

• Váttan frá arbeiðsgevara um, at umsøkjarin fær arbeiði. Skjal til arbeiðsgevaraváttan fæst við at trýsta her ella við at venda sær til politistøðina.

Í arbeiðsgevaraváttanini skal vera skrivað:

• Tjóðskapur umsøkjarans
• Fult navn
• Starv
• Navn, bústaður og telefonnr. hjá arbeiðsgevara
• Slag av arbeiði
• Brutto/nettoløn
• Arbeiðstíð og arbeiðstíðarbil, haruppií møgulig royndartíð

Arbeiðið má ikki byrjast, fyrr enn arbeiðsloyvið er fingið.

Annað arbeiði má ikki byrjast, fyrr enn arbeiðsloyvi viðv. hesum arbeiði er fingið.

Umsókn um leingjan av uppihalds- og arbeiðsloyvi kan latast inn til politistøðina á staðnum. Umsóknin skal latast inn 1 mánað áðrenn arbeiðsloyvið endar.

Undantikin fyri uppihalds- og arbeiðsloyvi

• Norðurlendskir ríkisborgarar eru undantiknir skylduna at hava uppihalds- og arbeiðsloyvi.

• Útlendskir montørar, tekniskir instruktørar og onnur, sum í einum tíðarbili stytri enn 3 mánaðir gera arbeiði í Føroyum í samband við uppsetan ella umvæling av maskinum ella líknandi, eru undantiknir skylduna at hava arbeiðsloyvi, sambært “bekendtgørelse om visse udlændinges fritagelse for arbejdstilladelse”.

Les alt orðaljóðið á nevndu kunngerð við at trýsta her.

Avgreiðslan

Avgreiðsla fyri útlendingamál er á øllum politistøðum opin mánadag - fríggjadag. Í Tórshavn verða útlendingamál tó bert avgreidd kl. 1000 til 1230.

Meira at vita

Meira fæst at vita á heimasíðuni hjá Udlændingeservice www.nyidanmark.dk og á heimasíðuni hjá Útlendingastovuni www.utlendingastovan.fo

Link til føroysku útlendingalógina.